°Ç¸ç³Ô¹Ï

Rhaid i brisiau fod yn glir, yn gyflawn ac yn gywir. Dylai defnyddwyr gael y wybodaeth sydd ei hangen arnynt i wneud penderfyniadau gwybodus, chwilio o gwmpas a chymharu prisiau cynhyrchion cystadleuol.

Er mwyn eu helpu, rhaid i fasnachwyr ddarparu cyfanswm eu prisiau ymlaen llaw. Os na fyddwch yn darparu prisiau cyflawn a chywir sy’n cynnwys taliadau na all defnyddwyr eu hosgoi, efallai eich bod yn torri’r gyfraith ac yn tanseilio ymddiriedaeth defnyddwyr yn eich busnes.

Mae’n anghyfreithlon cuddio ffioedd, trethi neu daliadau ychwanegol eraill y bydd yn rhaid i’r cwsmer eu talu tan yn ddiweddarach yn y broses brynu (a elwir weithiau’n ‘brisio cudd’).

Os canfyddir eich bod wedi torri’r gyfraith, gallech wynebu:

• dirwy o hyd at 10% o’ch trosiant, neu £300,000, pa un bynnag sydd fwyaf
• gorchymyn i roi iawndal i gwsmeriaid yr effeithiwyd arnynt

Mae hyn yn berthnasol i unrhyw un sy’n gwerthu, hysbysebu, marchnata neu fel arall yn hyrwyddo cynnyrch i gwsmeriaid ar unrhyw adeg yn y broses brynu, o hysbysebu cynnar i’r gwerthiant terfynol.

Fel y canllawiau llawn, mae’r dudalen hon yn defnyddio enghreifftiau i ddangos sut y gall y gyfraith fod yn berthnasol yn ymarferol. Nid yw’r enghreifftiau hyn yn gyflawn ac efallai bod ffyrdd eraill o gydymffurfio â’r gyfraith.

Rhowch gyfanswm pris y cynnyrch ymlaen llaw

Pan fyddwch chi’n dweud wrth gwsmer am gynnyrch a’i bris, bydd hyn fel arfer yn ‘wahoddiad i brynu’. Gall hyn gymryd sawl ffurf, gan gynnwys:

• pris ar gynnyrch mewn siop
• hysbyseb mewn papur newydd neu ar y teledu
• marchnata ar-lein, fel e-bost neu bost cyfryngau cymdeithasol
• tudalen ar eich gwefan

Nid oes angen i wahoddiad i brynu gynnwys cyfle i’r cwsmer brynu’r cynnyrch mewn gwirionedd.

Yn y gwahoddiad i brynu, rhaid i chi roi cyfanswm pris y cynnyrch i’r cwsmer.

Rhaid i chi gyflwyno cyfanswm y pris yn glir ac yn amserol fel bod y cwsmer yn debygol o’i weld, ni waeth sut rydych chi’n cyfathrebu â nhw. Os na wnewch chi hynny, bydd y wybodaeth yn cael ei thrin fel pe bai wedi’i hepgor.

Mae’r siart lif isod yn dangos pa wybodaeth brisio sy’n rhaid i chi ei chynnwys yn y pris a nodir yn y gwahoddiad i brynu (cyfanswm y pris).

Disgrifiad o’r ddelwedd: Camau i benderfynu pa wybodaeth brisio i’w chynnwys yn y gwahoddiad i brynu, fel y nodir yn y paragraffau uchod ac isod.

Cynhwyswch unrhyw daliadau gorfodol

Fel arfer, dylai cyfanswm y pris gynnwys unrhyw daliadau anochel neu ‘orfodol’. Ni fydd eu rhoi ar wahân fel arfer yn ddigon i gydymffurfio â’r gyfraith.

Mae tâl yn orfodol os oes rhaid i’r cwsmer ei dalu i brynu’r cynnyrch. Gallai hyn fod yn unrhyw:

• ffi, fel ffi i ddosbarthu neu archebu
• treth, fel TAW
• taliad anochel arall y byddai’n rhaid i’r cwsmer ei wneud i brynu neu dderbyn y cynnyrch

Os yw natur y cynnyrch yn golygu na allwch ddangos cyfanswm y pris, rhowch yr hyn sydd ei angen ar gwsmeriaid i’w gyfrifo

Yn dibynnu ar y cynnyrch, efallai na fydd yn bosibl i chi gyfrifo cyfanswm y pris cyfan neu ran ohono. Fel arfer bydd hyn oherwydd bod cyfanswm y pris yn dibynnu ar ofynion y cwsmer. Yn yr achos hwnnw, rhaid i chi roi’r wybodaeth ofynnol i’r cwsmer allu cyfrifo cyfanswm y pris eu hunain.

Rhaid i’r wybodaeth sydd ei hangen ar gwsmer i gyfrifo cyfanswm y pris fod mor amlwg â’r rhan o’r pris y gallwch ei chyfrifo. Yn ymarferol, dylid ei nodi fel arfer wrth ymyl y rhan o’r pris y gallwch ei chyfrifo.

Disgrifiad o’r ddelwedd: Mae’r hysbyseb ar-lein hon yn gwahodd cwsmeriaid i brynu llenni. Mae’r llenni wedi’u gwneud i fesur felly ni ellir cyfrifo cyfanswm y pris yn rhesymol, ond dangosir y pris uned o £25 y metr yn amlwg yn lle hynny. Dangosir y tâl dosbarthu ychwanegol o £9.95 hefyd yn uniongyrchol o dan y prif bris.

Defnyddio pris dangosol neu bris ‘sy’n dechrau o’

Gall cyfanswm y pris fod yn bris ‘dangosol’ neu’n bris ‘sy’n dechrau o’ cyn belled â’i fod yn cynnwys yr holl daliadau gorfodol perthnasol ac nad yw’n camarwain cwsmeriaid ynghylch beth mae’r pris yn ei gynnwys. Er enghraifft:

• hysbysebu pris gwyliau yn seiliedig ar arhosiad 7 noson i 2 unigolyn rhwng dyddiadau penodol
• hysbysebu pris gwasanaethau ffotograffiaeth ‘yn dechrau o £X’

Os yw natur y cynnyrch yn golygu na allwch gyfrifo’r pris yn rhesymol ymlaen llaw, rhaid i chi ddarparu gwybodaeth amlwg am sut y gall y cwsmer gyfrifo’r pris, fel y gallant gyfrifo cyfanswm y pris.

Nid yw hyn yn effeithio ar sut rydych chi’n derbyn taliad

Nid yw rhoi cyfanswm y pris ymlaen llaw yn eich atal rhag, er enghraifft:

• cymryd taliad am y pris hwnnw mewn rhandaliadau
• codi pris pro-rata (fel defnyddio aelodaeth campfa am gyfnod byrrach nag a hysbysebir)
• gwneud i’r cwsmer dalu rhan o’r pris i fasnachwr gwahanol, fel brocer neu gyfryngwr arall

Beth i’w wneud gyda thaliadau penodol

Taliadau dosbarthu

Rhaid cynnwys taliadau dosbarthu gorfodol yn y gwahoddiad i brynu. Os gallwch eu cyfrifo’n rhesymol, rhaid i chi eu cynnwys yng nghyfanswm y pris hefyd.

Rhaid cynnwys taliadau dosbarthu dewisol (er enghraifft, dosbarthu diwrnod wedyn) yn y gwahoddiad i brynu hefyd, ond nid oes rhaid iddynt fod yn rhan o gyfanswm y gost – gallwch eu darparu ar wahân.

Disgrifiad o’r ddelwedd: mae’r hysbyseb ar-lein hon ar gyfer esgidiau yn dangos pris o £90 sy’n ‘cynnwys dosbarthu safonol’, tâl gorfodol. Cyflwynir tâl dewisol ar wahân am ddosbarthu diwrnod wedyn (£5 ychwanegol).

Os oes rhaid i’r cwsmer ddewis rhwng taliadau dosbarthu, cynhwyswch yr opsiwn dosbarthu rhataf nes bod y cwsmer yn dewis un gwahanol.

Gall rhai newidiadau gorfodol i’r dosbarthiad amrywio (er enghraifft, yn seiliedig ar leoliad y cwsmer). Os nad ydych chi’n gwybod beth fydd y tâl, rhaid i chi gynnwys digon o wybodaeth yn y gwahoddiad i brynu i alluogi’r defnyddiwr gyfrifo cyfanswm y pris a dylid cyflwyno’r wybodaeth hon gyda’r un amlygrwydd â’r prif bris. Cyn gynted ag y gallwch gyfrifo’r tâl yn rhesymol, rhaid i chi ei gynnwys yng nghyfanswm y pris.

Gallwch hefyd gyflwyno gwybodaeth brisio arall i’r cwsmer yn y gwahoddiad i brynu, fel pris y cynnyrch heb gynnwys y dosbarthiad, cyn belled â’ch bod yn cyflwyno cyfanswm y pris yn glir ac amserol ac mewn ffordd y mae’r cwsmer yn debygol o’i weld.

Os ydych chi’n rhedeg gwefan fanwerthu, efallai y byddwch chi’n gallu cydymffurfio drwy ddangos yn amlwg y taliadau dosbarthu rydych chi’n eu codi a darparu cyfanswm cyfredol, gan gynnwys y ffioedd hynny, ar gyfer archeb y cwsmer drwy gydol y broses brynu. Rhaid cyflwyno’r cyfanswm cyfredol yn glir ac amserol, lle bydd y cwsmer yn debygol o’i weld.

Disgrifiad o’r ddelwedd: Mae’r fasged ar-lein hon ar gyfer gwasanaeth dosbarthu bwyd yn dangos cyfanswm cyfredol archeb y cwsmer, gan gynnwys ffi ddosbarthu. Cyfanswm y pris yw £14.49 gan fod y pris hwn yn cynnwys y byrgyr caws £12.00 a’r ffi ddosbarthu o £2.49.

Disgrifiad o’r ddelwedd: Ar y wefan hon, dangosir basged y cwsmer yn awtomatig pan gliciwch ar ‘ychwanegu at y fasged’. Mae’r fasged yn dangos cyfanswm cyfredol yr eitemau a ddewiswyd (monitor £100, clustffonau £50) a thâl dosbarthu gorfodol o £5, a adlewyrchir yng nghyfanswm y pris o £155.

Taliadau fesul trafodiad

Mae taliad fesul trafodiad yn daliad gorfodol sy’n berthnasol i bryniant neu archeb, nid i gynnyrch unigol. Ffi archebu untro, sefydlog, er enghraifft.

Beth sy’n rhaid i chi ei wneud

Cynhwyswch daliadau gorfodol fesul trafodiad yng nghyfanswm pris y cynnyrch, hyd yn oed mewn hysbysebion cynnar. Os ydych chi’n defnyddio pris ‘sy’n dechrau o’, dylai gynnwys unrhyw daliadau gorfodol fesul trafodiad.

Disgrifiad o’r ddelwedd: Mae’r hysbyseb gynnar hon ar gyfer cynhyrchiad theatr yn cynnwys tâl gorfodol o £2 fesul trafodiad yn y prif bris.

Prisio cyfnodol

Mae rhai cynhyrchion yn ei gwneud yn ofynnol i’r cwsmer wneud taliadau cyfnodol (misol yn aml) yn gyfnewid am wasanaethau parhaus. Mae enghreifftiau’n cynnwys tanysgrifiadau, aelodaeth campfa a chontractau band eang.

Beth sy’n rhaid i chi ei wneud

Os yw contract yn gontract misol treigl, sy’n golygu y gall y cwsmer ei ganslo ar unrhyw adeg, yna dangoswch gyfanswm y pris y bydd y cwsmer yn ei dalu bob mis (y pris llawn, gan gynnwys unrhyw daliadau gorfodol y bydd y cwsmer yn eu talu yn y cyfnod hwnnw).

Os oes gan gontract gyfnod gofynnol (er enghraifft, 12 mis), yna dangoswch naill ai:

• y pris cronnus ar gyfer y contract cyfan
• y pris sy’n daladwy bob mis, ynghyd â nifer y misoedd y mae’r pris hwnnw’n daladwy

Gallwch hefyd gyflwyno gwybodaeth brisio arall i’r cwsmer yn y gwahoddiad i brynu, cyn belled â’ch bod yn dal i gyflwyno cyfanswm y pris yn glir ac amserol ac mewn ffordd y mae’r cwsmer yn debygol o’i weld.

Er enghraifft, gallai campfa gynnig aelodaeth o £70 y mis am 12 mis, ynghyd â ffi ymuno o £30 (‘cyfanswm aelodaeth flynyddol: £870’).

Trethi a thaliadau lleol

Cofiwch gynnwys taliadau lleol gorfodol (fel ffioedd cyrchfan) a threthi yn y gwahoddiad i brynu bob amser. Fel arfer bydd modd eu cyfrifo a, lle gallwch eu cyfrifo’n rhesymol, rhaid i chi eu cynnwys yng nghyfanswm y pris.

Dylai prisiau ‘sy’n dechrau o’ neu brisiau dangosol (fel y pris ar gyfer 2 oedolyn sy’n aros am 7 noson) bob amser gynnwys unrhyw drethi a thaliadau perthnasol.

Os yw rhan o gyfanswm y pris i’w thalu gan y cwsmer yn lleol, rhowch symiau clir ‘talu nawr’ / ‘talu’n lleol’ iddynt yn ogystal â’r cyfanswm cyffredinol.

Os yw rhan o’r tâl i’w dalu’n lleol mewn arian tramor, gallwch naill ai:

• drosi’r tâl yn bunnoedd a’i gynnwys yng nghyfanswm y pris
• darparu’r pris cyfan mewn arian tramor

Wrth drosi o arian tramor, dylech hefyd ddweud wrth gwsmeriaid pa gyfradd gyfnewid a ddefnyddiwyd gennych i gyfrifo cyfanswm y pris.